الشعر مانـي مقتـرح دستـوره ولاني وكيل أدم علـى مذخـوره

ولكن من شـيٍ يحـز  بنفسـي هاضت به افكاري وهي  مجبوره

شعر النبط شفته بوسط الشـارع يمشي ويسحب رجله المكسـوره

وما شاهدت عيني عرفت  اسبابه زان الزمان وبانـت المصـروره

الشعر سـارت هيبتـه  ماطيـه تشاوتوه الربـع مثـل  الكـوره

يشوته الفارس وجـاه الحـارس ينقز على رجلـه ويلطـم  زوره

واهدافهم يا للأسـف  مكشوفـه اغراض شخصيه وصوت وصوره

يستخدمون الشعر لبسط  حاجـه وش هالبشـر منهيـةٍ مأمـوره

إما هـذم رَجـلٍ بـدون  مبـرر او يمدحه مدحٍ يمـس  شعـوره

مدحـه بوجهـه يعتبـر مسبـه إذا كان يعـرف مستـواه ودوره

ولا تهيـض عمـنـا متـغـزل واعطى الجهاز الحر من ميسوره

يصف بنات الناس وصفٍ خاطيء وداوم بحلـقٍ كنـه  الماصـوره

ثم قال أنا شاعر وجـاك محـدر يعـدّ حالـه ناجـحٍ مـن  دوره

هو ما درى ان الشعر مضلومٍ به وإنه بشـر وصحتـه محظـوره

يا من ظلمت الشعر خاف من الله خله يعيـش وحالتـه مستـوره

يا الربع كلمة شعر تبغى شاعـر مثل السديري يوم غاص بحـوره

وابن ربيعـه والخـلاوي راشـد ولا عبيد العلـي يـوم عصـوره

ومثل القضاه ومحسن  الهزانـي وابن شريم اليـا رفـع باكـوره

وابن حميد وشالـح  القحطانـي ولاهي عن اهل المعرفه مقصوره

ولاني مجامل مع هـذا والثانـي اعـدّ شعـار النبـط  وابحـوره

واللي ما هو قنعان ينشد  عنـي يـزورنـي للبـحـث ولا  زوره

وعندي اللقاء كلٍ يجـرب حظـه ولاني وكيل أدم علـى مذخـوره

الشاعرالكبير رشيد بن زيد الزلامي